وايد ناس تسأل وتتقصى وتحاول تعرف رأي المحللين السياسيين بسالفة أحد النواب اللي كررها اكثر من مرة وبأكثر من مناسبة بحل المجلس والعودة إلى الشارع على قولته... لأنه قبل فترة قال وركز كلامه بأن المجلس مو بقالة يفتحونها ويسكرونها كل ست شهور! طيب شاللي تغير وشاللي صار؟ آنا كوني مواطن كويتي بتاع كلو..وافهم حتى بالباجة.. عندي رأي.. او خلوني اقول لكم..عندي تحليل قريب من المنطق ويلامس الحقيقة..(حقيقة ويلامس هذا مو بوشيخة هذا جهاد الخازن)...المهم... المنطق يقول ان هذا النائب انسان ديمقراطي يحترم الدستور.. والدليل والمنطق يقول ان النائب متمسك بالدستور.. والمنطق يقول انه احد اهم المدافعين عن رأي الاغلبية بكل تاريخه خلال وجوده بالمجلس..طيب ليش المنطق هالمرة طلع باون والجيكر والميكر مو عنده؟ آنا اقول لكم تحليلي..النائب المذكور اكبر الخاسرين من هذا المجلس اللي الانجازات فيه تحجي عن نفسها من خلال عمل اللجان... المذكور اكبر الخاسرين من تعاون الحكومة، ورئيسها بالذات مع اغلبية النواب واللي بفضل هالتعاون انحلت وايد قضايا.. النائب اكبر خاسر من اقرار خطة للتنمية عيزت عنها غالبية الحكومات السابقة... واصبح صوته العالي غير مسموع..وصار محد يعطيه اهتمام بعكس قبل..تبون عاد الزبدة والحجي اللي يشق القحفية والكلام اللي يجمد على الشارب.؟ النائب ما غيره كروته كلها احترقت وصار وحيد وما زال احمد السعدون موجود وفعال وشغال بدون صراخ.. فالريال قرر التخلي عن المنطق واللجوء إلى الشارع اللي أفرزه لبلوغ غاية التعويض من خسارته الفادحة.. بالعربي الفصيح النائب انكشف.. وبالكويتي القح النائب راح ملح.. واهل السياسة يسمون اللي يمر فيه.. بداية النهاية.. هذا تحليل سويته بمختبري الخاص..صدقتوه اهلا وسهلا..ما صدقتوه كيفكم..

• كلمة راس
راح يطلع لي جم واحد بالانترنت ويكتب ان بوشيخة مدفوع له علشان يهاجم هذا النائب الرمز.. ضمير الامة..صوت الشعب..إلخ، وقبل لا يتغدون فيني بمزمز فيهم واقول لهم...في واحد اسمه الحركي (ابن العاص) علمني التحليل والتحليق المنخفض.. ودفع لي ابتسامته الحلوة فكتبت ما كتبت.. وباباي..